Monday, February 18, 2008

روح

روح.. انتظرت طويلاً مجئ الشتاء
ليتحرر القلب من كل الأعباء
ويغسل المطر الهفوات السوداء
ويتراقض الفرح مع قطرات الماء
وتصبح حرة كالغيوم فى السماء
****
روح .. انتظرت طويلاً مجئ الربيع
ليتلاشى الكذب الملون ويصبح الكون وديع
وتمحو الحزن بلون الورد والفراش البديع
ويكف القلب عن الارتجاف وسط الصقيع
ويقتحم الحل ذلك القلب المنيع
****
روح.. انتظرت طويلا مجئ الصيف
لتذيب حرارته كل الأوهام
وتمحو نسماته طعم الألام
وتفيق هى من عبث الأحلام
وتكف الليالى عن طعنها بإحكام
****
روح.. انتظرت طويلاً مجئ الخريف
لتعبث وحيدة بأوراق الزمن السخيف
وتتجرد الألام وتصبح مجرد احساس طفيف
وتحيا وسط اجواء الموت المخيف
ثم تعود لتواجه واقع الحياه العنيف

Monday, February 11, 2008

We are the CHAMPIONS

كنت عارفة ان احنا الى هنكسب
(ثقـــــــــــة)
الفرحــــــــه
مبروك لينا كلنا
غانا رجعنا بالكاس معانا

كنت عايزة بجد أشوف الماتش دة فى مكان مفتوح .. أكيد مش فى بيتنا أصل بيكون ليها طعم تانى نفسى اجربه إقترحت على ماما الموضوع دة ، ومش توصلنا انا وهى لنتيجه ايجابية بالمرة .. وفى الاخر كلمت صحابى وقلتهلم تعالوا اتفرجوا معايا على الماتش .. رغم انهم أصلا مش ليهم فى الكورة ولا حتى انا ليا اوى يعنى ..بس الماتشات المهمة مش ينفع تتفوت .. المهم يعنى .. لبست طقم الماتش - أحمر فى أبيض فى أسود - ورسمت علم مصر - 3 علم مصر- وقعدنا نستنى الجون


الماتش كان فعلا عبقرى .. كان مستفذ شوية فى الاول عشان الاجوان الى ضيعها عمرو زكى و أبو تريكة و عماد متعب .. كان فى شوية كور مينفش تضيع ..
المنتخب المصرى بدأ الماتش بهجوم قوى جدا وكل واحد وقتها لعب زى ما الكتاب بيقول يعنى لكن الدفاع الكاميرونى - رغم انى شايفة انه على قده على الاقل مش زينا - منعهم من احراز اى هدف بالاضافة لحارس المرمى الكاميرونى كامينى كان ذكى جدا فى الماتش وضيع مننا اجوان كتير
لحد ما عماد متعب طلع وفقد فرصته فى انه يحرز اى هدف البطولة دى ونزل مكانه زيدان .. كانت تمريرة عبقرية جدا منه لابو تريكه رغم ضغط الدفاع الكاميرونى بشكل بشع عليه ..
بعد الهدف المصرى الرائع أشتد جدا الهجوم الكاميرونى وارتفع معاه مستوى الدفاع المصرى ومستوى عصام الحضرى والى منعهم من تسديد اى هدف وحافظ على تقدمنا عليهم - الله عليك يا حضرى -
حسن شحاته .. الله عليك .. كسرت اسطورة المدرب الاجنبى وعقده الخواجه
أبو تريكة وزيزو كانوا عاملين ديو رائع البطولة دى خاصة فى اخر ماتشين - بين مصر وكوت دى فوار والنهائى مع الكاميرون- أبو تريكة الناس كلها بتحبه وزيزو هيستفيد جدا من البطوله دى لأنه لعب كويس وعرف يظهر نفسه تمام
عماد متعب كان متألق البطولة الى فاتت مش عارفة جراله ايه المرة دى .. يمكن سوء حظ بس مش عدم تركيز لان تحركاته فنيا كانت سليمه بدليل ان حسن شحاته كان بينزله كل ماتش رغم انه مش بيجيب اجوان - هارد لاك يا عمده -
وائل جمعة كان دفاع قوى جدا مش جديد عليه هو بيلعب على طول كويس اوى
عمرو زكى تايجر الكرة المصرية بجد مش خسارة فيك اللقب ومش خسارة فيك حب الناس
أحمد حسن لعب حلو اوى وكان متميز جدا دة غير ان روحه فعلا حلوة خاصة بعد ما قال مش مهم مين بيلعب المهم نرجع بالكاس وقتها عرفت ان لو دى الروح المسيطرة عليهم فعلا يبقى بجد هنرجع بالكاس زى ما قال
ابراهيم سعيد كان دفاع كويس والحمد لله على غير العاده مش عمل مشاكل ..ربنا يهدى يارب
حسنى عبد ربه كان لازم يختاروه أحسن لاعب لخط الوسط رغم الظروف الى هو فيها والى المفروض تكون موتراه جدا بس كل دة مش أثر على لعبه سلبيا.. بالعكس
ميدو وحسام غالى فضلوا أنديتهم الاوربيه على المنتخب المصرى واكيد مش هتمنالهم حاجة وحشة ..ربنا يوفقهم بس لاتعليق
حسام حسن .. بجد افتقدتك البطوله دى
انا مش عارفة كل اللعيبه بالأسامى على فكرة ومش معنى انى مش ذكرت بعضهم يبقى انا مش معترفة بدورهم بالعكس كلهم بجد لعبوا حلو اوى
ARTكانت لفتة ظريفة منها المليون جنيه الى قدمتها للمنتخب المصرى .. انا فرحت جدا بيهم
كل المنتخب كان حلو أوى وعملوا الى عليهم وزياده والله .. وفى وسط اللخبطه الى ناس كتير مننا فيها هما قدروا يفرحونا .. ربنا يفرحهم يا رب
الجماهير المصرية .. مش ممكن بيشجعوا فى اى مكان وفى أى ظروف .. يخرب بيت الجنان.. كمان فرحانه ان الجماهير العربية شاركتنا فرحتنا واحتفلوا معانا .. بجد شعور طيب جدا منهم
مراسم تسليم الكاس كانت حلوة اوى والبنوتة رغم انها سمرة أوى بس ملامحها بريئة وجميلة بعدها احمد حسن طلع اخد الكاس زى السنة الى فاتت
الحقيقة الى انا مستغرباله اوى ان كل الناس شايفى ان سبب الفوز المدرب والمنتخب والروح الجميلة الى كانت مسيطرة عليهم .. ونسيوا تماما طقم الماتش الى انا لبسته والتلات اعلام الى رسمتهم ومش طلعوا ليا اى دور فى الانجاز دة يعنى
مش عيب بردو ؟؟